عيل تايه !

البلوج دي قديمة نسبيا ،، لقيتها وانا بقلب ف نوتس الفيس بوك ونسيت انقلها للمدونة :)

بتاريخ 21/3/2011

~~~~~~

عيل تايه يا ولاد الحلال

عيل تايه يا ولاد الحلال

عيونه مليانة نقاء

ولو مصر

تعرف لون عيونه

فهي زي روحه،، لون العسل

بسمته مليانة صفاء

ضحكته بتطلع من الثانية للثانية

عيل تايه يا ولاد الحلال

عمره؟

عمره مليون ضحكة

ويمكن اكتر بس مش اقل

ولو كنت مصر

تعرف عمره بعداد الزمن

يبقى عمره سبع سنين

عيل تايه يا ولاد الحلال

طوله؟

طوله اطول من مكتبه اللي يا ما رسم عليه،، بس مش اقصر

ولو مصر

تعرف طوله بعداد الاطوال

يبقى طوله ييجي نصك

عيل تايه يا ولاد الحلال

اسمه؟

امه بتناديه ابني ،، وابوه بيناديه ابني

وانا بناديه "نفسي" !

تاه ازاي؟

ما اعرفش

كنت ماشية،، وهو جوايا ماشي

سرحت وفقت، اختفى !

ارجوك لو لقيته. وديه لبيته

روحي !

Facebook Comments