كلام كتير كده لازم يتقال !

بداية ،، انا لاحظت ان عدد من المدونين ، ع الاقل اللي قدرت أتابعهم عامل اضراب عن التدوين تضامناً مع الموقف الحالي للبلاد

بقدر الموقف ده، لكن عن نفسي ما اقدرش لإن المدونة بقت متنفسي،، ع الاقل اقدر اكتب فيها بدل ما انا باخد باخد من الاخبار والافكار ، ومحتاجة افرغخا بأي شكل :(

المرة دي بكتب التدوينة م الكمبيوتر بعد فترة من الاعتماد ع الموب بس عشان ادير وقتي، عشان فيه كلام كتير عاوزة اقوله

صراحة لا أعرف من أين أبدأ

بداية ممكن أبدأ بتوضيح فكرة

الناس ف اتجاهين ،، يمين وشمال

صح وغلط ،، ما علينا
المهم ،، فيه ناس بتتصرف صح في الاتجاه الصح ، وناس بتتصرف غلط في الاتجاه الصح برضه !

يعني الناس اللي تعمل شير لاحتياجات التحرير والاخبار (بعد التأكد من صحتها) هديهم تعظيم سلام..
إنما اللي يعمل شير لأي خبر يشوفه من غير ما يتأكد ،، اللي يعمل شير لأخبار مش هتفيد إطلاقاً (إيه الفايدة من اني اشير اسم وعنوان ظابط من الظباط ،، دي كارثة اصلا ، مين قال المعلومات دي صحيحة؟ وفيه ناس مش بتتصرف صح اصلا ممكن ينيلو الدنيا اكتر)
نيتهم في الاتجاه ده ، لكن انفعالهم بيخليهم ياخدوا تصرفات هتضر اكتر ما تنفع..
مش عاوزين اي حاجة تتحسب علينا وتقلب الصح غلط !

كمان شيء

فئة كبيرة من الناس ناسية او متناسية ان الاكل والشرب والمسكن والملبس ، كل دول وسائل للحياة مش غايات (حتى التعليم متحور لإنه طريق لشغل أفضل بالتالي نقود أكتر !)
لو شلنا الوسائل دي (اللي ممكن يضحوا بكل حاجة عشانها) ، هنلاقي فراغ !.. إحنا ما اتخلقناش لكده..

إحنا اتخلقنا عشان نحقق غايات،

 غاية المعرفة

 غاية النجاح

 غاية الكرامة

غاية الانسانية باختصار !
والمسكن والملبس والمأكل والمشرب ،، كل دي وسائل تساعدنا على الحياة لتحقيق الغايات دي
وسائل مهمة جدا ، بس مش معناه اني اتخلي عن غاياتي عشان وسائلي بس

مش هرضى اختزل حياتي في وسائل الحياة بس، في مجرد الحياة وخلاص.. !

حاجة كمان

يعني ايه بلطجية يضحوا بحياتهم؟ يصمدوا 4 ايام.. والعدد قابل للزيادة

اللي بيصدق كده ، بيصدقه عشان عاوز يصدقه ! 

يا اما م الخوف، سواء م المواجهة او م الحدث بذاته،، لانه حدث صعب جدا لا أنكر
يا اما انسحاب، عايز يفضل يعتاش لأجل العيش وفقط.. مش راضي حد يفجر الفقاعة اللي عاملها لنفسه (اللي تكونت ع مر حياته)

حاجة كمان،
إحنا في فترة عصيبة ، بتضغط ع اعصاب كل المهتمين بجد سواء في كلا الجهتين،
فارجوكم.. ما تسيبوش اعصابكم تفقدكم السيطرة ع الحكم ع الموقف

عارفة ان الكلام لا بيودي ولا بيجيب، حقيقة انا مكسوفة من نفسي باني عمالة اتكلم ،، لكن ده اللي اقدر اعمله دلوقتي ، حتى عشان اعرف اركز من زحام الافكار اللي عندي

وأخيراً ،، أنا كل مدى بحترم اكتر الناس اللي ف التحرير ، المثابرين
وكل شوية بدعيلهم ، ويا رب يستجيب

انا غدا ان شاء الله وكل يوم لحد يوم الخميس 1 ديسمبر ما عدا الجمعة والسبت عندي امتحانات الميدترم ،، واللي الله أعلم هعرف اركز فيها ازاي مع الاحداث دي.. بس هركز وربنا ييسر

يا رب إنا مغلوبون فانتصر !

Facebook Comments